想講少少關於男性唔識俾情緒價值呢樣嘢。
頭盔定先，我唔係話啱定唔啱亦唔係要與女性為敵，只係想講返個成因有機會係咩。

我諗好多人都聽過「男仔之家喊乜呀喊」、「男仔嚟㗎嘛Man啲啦」呢類說話，當由細到大都聽呢啲說話聽得多，就會好易被潛移默化做收埋情緒先係一件正確嘅事，就算有心事想同朋友講，都會怕俾人覺得乸型而唔敢出聲，而成長時期被嘲笑乸型同唔玩得幾乎係人格羞辱嚟，就算覺得唔合理都好咪焗住扮無嘢去自保。

可惜壓抑唔會消滅或者解決到情緒問題，而呢啲負面嘅情緒其實會一直積存，爆發出嚟嘅時候就會好易傷到自己同身邊嘅人，就好似打開無排壓嘅壓力煲咁，個傷害可以係毀滅性嘅。

而長期壓抑又會衍生另一個問題，就係令人唔識辨別自己嘅情緒，就算感受到喜怒哀樂，都摸唔清喜怒哀樂嘅源頭係咩，就更枉論了解其他異性嘅情緒係點，表達情緒同辨別情緒都係需要學習嘅事，呢啲嘢真心唔係出廠就會識，亦唔係話成為大人之後就必然會好咗。

當然理解成因唔代表一定要選擇體諒，但呢個世界係無完美另一半，好多相處融洽嘅情侶夫妻都係靠磨合而嚟，而磨合係需要時間，亦唔係一定會成功，不過兩者都係識反省同道歉嘅人，段關係就會大機率健康啲。