大陸逮捕寫手，諗起之前碌Threads見到有大陸網友討論電影時講，藝術好多時都係探討人性同揭示苦難，如果大陸唔滅聲，佢地有咩苦難寫唔出。

笑咗笑之後，覺得好難過。

至今難以忘懷《霸王別姬》帶俾我動魄驚心嘅震撼，陳凱歌導演將李碧華嘅原著小說提升到另一層次，小說結局後來都有改返做電影版結局；曾經喺豆瓣見過有影友講，話嗰陣以為開始迎來中國電影嘅盛世，點知已經係最後嘅高峰。

我喺00年代就蒲大陸網文論壇，見識過大量有水準嘅文字。嗰陣好少河蟹，曾經嘅大陸網文係敢寫到不得了，文筆創意俱備，平均水準拋離其他中文地區嘅寫手一大截（當然都同佢地人口基數大有關），嗰陣甚至有啲論壇有評文制度，啲超有才嘅作者組成評審，擺得入精華區嘅小說絕對有過人之處。

嗰時傳統文學同高質網文一齊睇，十餘年來汲取大量文字營養，係我少年時代難得值得回味嘅時光。

後來每隔一段時期官方就出手「整頓」，好多追過嘅寫手、睇過嘅文章消失晒，又有寫手俾人拉，人心惶惶，仲留得喺架上面嘅文章啲主角突然要做愛國小先鋒，情節文筆弱智之極，哪怕知道係明哲保身之舉，但難免教人反胃。

囚禁逼迫人民腦袋，再問你何解不愛。
最強黑色幽默莫過於此。