今日又從友人身上聽咗啲感情事。

兩公婆都感嘆，一個可以食軟飯並喺唔同女人身上獲得大量好處嘅男人，條件真係唔使特別出眾，表現溫柔貼心啲就可以。

尤其有好多女性喺惡老母+沉默老豆呢個組合入面長大，佢地成長期間潛移默化咁受到影響，令佢地需要透過支配另一半去獲得安全感，太有主見嘅男人會令佢地捉唔住，反而會不安。

呢類女性性格最大共通點係鱷魚頭老襯底，望落好強勢，好多嘢自己搞得掂而少啲得到人關心。當男人唔強出頭咁幫佢地、挑戰佢地嘅能力，反而用貼心溫柔嘅姿態出現喺佢地身邊關心多幾句，唔使特別靚仔有錢，都可以輕易獲得佢地嘅芳心。

呢啲男人通常桃花不絕，亦因為留後路俾自己而唔會好乾脆咁拒絕人，係曖昧關係嘅高手，最叻藕斷絲連，而強勢女性偏偏想得到個答案，就喺度蹉陀時間。

一個男人真係想同你一齊邊有咁多無可奈何，唔好再幫佢搵藉口，拍雷雨定瓊瑤劇呀依家。

佢扭扭擰擰只係代表佢其實唔係咁想同你一齊但又想享受被愛嘅感覺、或者喺你身上得到好處咋。

不過走定唔走放定唔放手，係要睇自己。
有幾多人全因為「唔甘心」而一生情路坎坷。