近排Brian敗走日本返香港呢件事成為咗在日港人同YouTube界嘅討論話題。唔想講啲咩落井下石嘅說話，只係想藉呢件事講下移民心態。

日本係一個移民究極唔friendly嘅地方，除非入籍，如果唔係充其量係攞到永住身分，同日本人結婚都係拎配偶簽。儘管依家日本勞動人口唔夠而需要輸入大量外勞，佢地都係喺勞工簽證上變嚟變去，但大方向係本質上無咩大變過。

我因為機緣巧合好迂迴地長居日本，而事實上我本來對呢個地方係無任何濾鏡，完全無對日本有任何幻想，亦對佢地各種封閉古板思想係有晒心理準備先嚟，都有俾日本人激到跳掣嘅時候。

但呢度有冇可取之處？
當然有好多，如果唔係就唔會選擇長住喇，而且東京嗰陣冷漠真係好啱我，最好我唔煩你你都唔好理我，大家無視大家最理想。

作為異鄉人係要調整好多心態，而亦要認清某啲問題其實唔關地方事，更多係自身嘅問題，懶嘅人移咗民唔會突然變到懶都有錢湧過嚟。

試諗下，如果有某個國度可以滿足全人類願望，嗰度晨早俾人迫晒入去，最後都解決唔到大家願望。

世上無烏托，度度都有辣有唔辣，好老土但又真嘅嗰句，就係安心處便是吾鄉。