之前都喺度同網友因應唔同話題討論過幾次，點解依家越嚟越多人唔容許其他人擁有與自己不一樣嘅愛好。上網都上咗好多年，見証過Newsgroup嘅尾巴到依家嘅SNS年代，以前大家有種共識，識分各種討論區或者題目去聚眾，俾啱傾嘅人埋堆，唔啱傾嘅就避開佢，因此近年「洗Tag」呢個行為係令我異常不解。

擺啲唔屬於嗰個Tag嘅內容洗人地個Tag，目的就係要激嬲其他愛好者，其實咁做有咩為呢？呢個世界唔可能得單一嘅聲音㗎喎，唔鍾意睇咪唔好睇囉，做咩做人做到咁霸道呢。

同朋友討論，演算法時代好似好反傳統權威，但其實流量就係權威，再加上social media佔生活比例太重，好多人嘅社交活動就係互聯網，逐漸分唔到自己同世界嘅距離，唔知自己所睇所接觸嘅係俾演算法餵大。慣咗活喺個泡泡入面嘅時候絕大部份時間只見到想睇嘅嘢，當見到同自己不一嘅喜好時唔識尊重，只想消滅，都係一個維持安全感嘅反擊行為。

活喺網絡同活於現實，最大分別係要郁啲就開拖嘅代價都大好多，作為一個摺到不能嘅毒撚都覺得依家太依賴網絡令好多人社交技巧越嚟越差，唔識同人相處，先察覺活於現實好有必要。

幾時都係無咗先知咩寶貴。