因買嘢同店員嗲咗幾句，佢問我邊度嚟，我就話香港。跟住佢問我：好多香港人都唔prefer被叫做Chinese，可唔可以話我知點解？

跟住我就棟咗喺舖頭同佢極速用咗十分鐘快速地講咗來龍去脈，歷史背景呀以前香港係佢大英祖國殖民地（佢完全唔知😂）呀英國點交香港俾大陸呀矛盾呀衝突呀，佢一邊聽一邊點頭然後又問下問題我又答下。

佢：咁即係你地淨係用嘅語言文字都唔同？
我：唔同呀。
佢：哇，諗下都覺得會好痛苦。
笑嘆咗口氣，我話：係囉，估都估到會幾痛苦。

佢問我仲會喺倫敦留幾日，我話好快走啦，佢話係咪返香港，我話唔係呀返東京。

佢問：點解搬咗去東京嘅？
好多情緒湧上心頭，只好講句：原因好複雜。

踏出舖頭等巴士，企喺現代與西式建築並立嘅街頭，有瞬間錯覺自己喺中環等車返屋企。

店員最後條問題言猶在耳。
係囉，點解呢？我都想知點解。