總見唔少人會用「我得、你都得」去鼓勵人，但佢地忽視咗自己嘅某啲條件來得比其他人優越，例如家境、出生地、智力等等因素，而忽視咗自己其實係極為幸運嘅一班人。

甩藥之後同某啲以前嘅病友傾偈，佢地讚我好叻，我一直都唔覺得自己特別叻，因為我覺得有更多係幸運，幸運地有嗰股想活落去嘅硬頸、覺得可以有一百個死去嘅理由而唔想係呢個原因，先慢慢走到出嚟。

期間當然付出咗好多努力，但我真係無法將呢一切歸功於自己嘅努力，因為好多撐唔住嘅佢地分分鐘比我更努力，佢地同我之間嘅差異可能就係爭嗰少少嘅幸運，有啲嘢真係不由人可控制，有時諗返起某啲人我都仍然好難過。

承認自己嘅幸運唔等同否定付出咗嘅努力，係懷住感恩嘅心去珍惜唔係理所當然嘅幸福。當明白所擁有嘅並唔係理所當然嘅時候，會更加容易對某啲唔理解嘅事物心生慈悲。