睇到公海不時有人讚嘆簡中女嘅文字。

以前做嘢嗰時認識咗個大陸女同事，至今仲好好朋友，會咁老友嘅原因係我地好鍾意彼此嘅文字而佢又怒鍾意香港文學。我有好長一段時間都唔知佢鍾意我啲字啲乜，畢竟在我眼中看來佢啲文字嘅功力實在太深厚，好多嘢不明言細說驟似講完好似無講，但行文中總會無啦啦捅人一刀，嗰份後勁係我只能望塵莫及。

而我問佢鍾意我啲字啲乜，佢話佢好羡慕我行文間嘅自信同俐落，總係可以三言兩語就交代咗件事係咩，唔似得佢好似要扭嚟扭去先可以搵個位攝啲真正嘅諗法出嚟，佢好想學但始終學唔到。

後來逐漸明白，成長環境係孕育文字風格嘅土壤，喺佢地嘅成長環境底下好多人係慣性壓抑自己嘅想法同感情，越聰明嘅人就越習慣壓抑，越清醒越痛苦，嗰種痛苦唔單單係針對某個題目、比如感情、而係全方面地學識迂迴曲折地表達，嗰種行文裡滲透嘅陰鬱係其他地區好難仿效。

香港人唔慣曲筆書寫，係因為我地嘅環境曾經容讓我地直白表達，嗰種陰陽冷諷嘅藝術唔係一朝一夕可以培養。明白呢個道理之後，會以欣賞對方嘅文字角度出發，而唔再勉強自己刻意模仿，但都會努力從中汲取營養。

呢種文字嘅交流係會令人好滿足。