返日本之前兩家人一齊坐埋食咗餐飯，恨孫恨到流晒口水嘅老母喺席間開我大拖，話如果下次唔帶多個返嚟就唔使再返嚟。

老實已經被佢勒索到無咩感覺，知道點講都好佢都唔會改變，就係仔女必須要如佢嘅願做人，但喺另一半父母面前咁俾佢爆著實難堪，難為對方父母都好努力去講說話幫手打圓場，但家母嗰種全天下佢大撚晒嘅態度仍然依舊。

感動嘅係第二日我收到伯友一封好長嘅msg，除咗勸我唔好嬲阿媽，亦都講咗好多說話去安慰我，我估佢都睇得出嗰晚我有幾尷尬。

忽然諗起唔想生細路嘅人大多數都唔多想出世，伯友識咗我之後呢十幾年周不時同我講，有時我會諗如果你係我生嘅咁你話幾好。咁多年嚟父母都唔記得我生日，唯有佢年年準時送上祝福，我打電話俾佢傾偈仲多過搵我父母傾偈。

原生家庭係點無得選擇，但有時回望，我覺得自己仍然係幸運，因為我後來遇上嘅好多人都俾咗好多好意同愛俾我。人去數自己無啲咩可以數到下世都未數完，我數口唔叻，我鍾意數自己擁有啲乜，有時都覺得自己幸運值都叫點好點滿，因為遇到好多好人。