棟樓有一家人，老豆家暴全家出晒名，據聞仲性侵自己啲仔女，日日夜夜都家嘈屋閉。隔離鄰舍撞口撞面傾開偈都話唔知幾時先會打死人，佢啲屋企人好慘，吹完水就各自返歸過生活。

直到有一日，有個啱啱搬入嚟嘅人報警，嗰晚凌晨開始警笛聲大響，再加埋搜証仲要錄口供，嗰段時間居民出入都好麻煩，有一班人就屌鳩新搬入嚟嗰戶人多管閒事。

問佢地：點解咁叫多管閒事？
佢地答：閂埋門就係人地嘅家事、插咩手呀？
再問佢地：個仔有日俾人打到爆晒缸拍你地門喎
佢地答：你點知個仔係咪衰乜先俾人打呀？老豆教仔好難㗎，你未生過細路你唔知㗎喇！

仲有一班人，知道佢地俾人打咗好耐，對住滿街嘅警車好不安，話好擔心。

問佢地：其實你地擔心啲乜呀？
佢地答：知佢地老豆仆街好耐，但你點知啲細路之後會俾人送去咩地方？聽講啲男童院女童院好亂㗎，等間入咗去仲慘點算呀！以前睇過好多入咗去之後壞晒成世人就咁無咗呀！
再問佢地：但再咁打落去分分鐘命都無喎！
佢地答：我地都明⋯⋯但其實佢地有冇試下同老豆下㗎，可能有彎轉呢？可能佢地態度誠懇啲乖啲，個老豆條氣順咗咪唔打囉。

點點頭。
警笛聲仍然不絕於耳。